sham-e-dil sham-e-tamannā na jalā maan bhī jā
tez āñdhī hai muḳhālif hai havā maan bhī jā
aisī duniyā meñ junūñ aise zamāne meñ vafā
is tarah ḳhud ko tamāshā na banā maan bhī jā
kab talak saath tirā deñge ye dhuñdle saa.e
dekh nādān na ban hosh meñ aa maan bhī jā
zindagī meñ abhī ḳhushiyāñ bhī haiñ ra.anā.ī bhī
zindagī se abhī dāman na chhuḌā maan bhī jā
shahr phir shahr hai yaañ jī to bahal jaatā hai
shahr ko chhoḌ ke sahrā ko na jā maan bhī jā