dil meñ utregī to pūchhegī junūñ kitnā hai
nok-e-ḳhanjar hī batā.egī ki ḳhuuñ kitnā hai
āñdhiyāñ aa.iiñ to sab logoñ ko ma.alūm huā
parcham-e-ḳhvāb zamāne meñ nigūñ kitnā hai
jam.a karte rahe jo apne ko zarra zarra
vo ye kyā jāneñ bikharne meñ sukūñ kitnā hai
vo jo pyāse the samundar se bhī pyāse lauTe
un se pūchho ki sarāboñ meñ fusūñ kitnā hai
ek hī miTTī se ham donoñ bane haiñ lekin
tujh meñ aur mujh meñ magar fāsla yuuñ kitnā hai