bhūlī-bisrī yādoñ kī bārāt nahīñ aa.ī
ik muddat se hijr kī lambī raat nahīñ aa.ī
aatī thī jo roz galī ke suune nukkaḌ tak
aaj huā kyā vo parchhā.īñ saat nahīñ aa.ī
mujh ko ta.āqub meñ le aa.ī ik anjān jagah
ḳhushbū to ḳhushbū thī mere haat nahīñ aa.ī
is duniyā se un kā rishta ādhā-adhūrā hai
jin logoñ tak ḳhvāboñ kī sauġhāt nahīñ aa.ī
uupar vaale kī man-mānī khalne lagī hai ab
meñh barsā do-chār dafa barsāt nahīñ aa.ī