sūraj ugā to zindagī kī shaam ho ga.ī
ab sub.h-e-nau bhī maut kā paiġhām ho ga.ī
dil meñ samā ga.iiñ vo zamāne kī nafrateñ
mehr-o-vafā bhī āḳhirash badnām ho ga.ī
insān saare masjid-o-mandir meñ baT ga.e
insāniyat is daur meñ nākām ho ga.ī
zaitūn kī jo shāḳh uThā.e thā haath meñ
gardan qalam usī kī sar-e-ām ho ga.ī
'afshāñ' kahāñ se laa.eñ vo aslāf kā ḳhulūs
tārīḳh kī kitāb hī nīlām ho ga.ī