tum bhī ab shahr se Dar jaate ho had karte ho
dekh kar mujh ko guzar jaate ho had karte ho
nain to yūñhī tumhāre haiñ balā ke qātil
us pe tum roz sañvar jaate ho had karte ho
merī āñkhoñ se bhī aañsū nahīñ girne paate
merī āñkhoñ meñ Thahar jaate ho had karte ho
mere jazbāt meñ tum bah to liyā karte ho
kaise dariyā ho utar jaate ho had karte ho
maiñ bhī har roz tirī maan liyā kartī huuñ
tum bhī har roz mukar jaate ho had karte ho
terī ḳhushbū ko zamāne se chhupā.ūñ kaise
tum jo chup-chāp bikhar jaate ho had karte ho
tum to kahte the rabāb ab maiñ tirī mānūñgā
phir bhī tum der se ghar jaate ho had karte ho