mahv-e-hairat huuñ zamīñ-zāde kahāñ tak aa ga.e
jin ko rahnā thā zamīñ par āsmāñ tak aa ga.e
rāz-e-ulfat dil meñ rakhne kī qasam khaa.ī magar
jab havā badlī to vo nok-e-zabāñ tak aa ga.e
hādsoñ ne dil kī barbādī pe merī bas na kī
vo miTāne ko mirā nām-o-nishāñ tak aa ga.e
ḳhud-kushī thī yā taqāzā-e-numū-e-shauq thā
dil ke dariyā āb-e-bahr-e-be-karāñ tak aa ga.e
zaḳhm-e-dil kī daad paane kī tavaqqo.a jin se thī
vo to ulTe jān-o-dil ke imtihāñ tak aa ga.e
kāmrānī haft-ḳhvān-e-shuq kī jāneñge ham
DhūñDte ain-e-yaqīñ vahm-o-gumāñ tak aa ga.e
barq-raftārī meñ 'rāhī' sar kiyā vo sañg-e-mīl
the farishte bhī pas-e-rū ham jahāñ tak aa ga.e