sab thakan aañkh meñ simaT jaa.e
niiñd aa jaa.e raat kaT jaa.e
rū-ba-rū hoñ to guftugū bhī kareñ
kaun āvāz se lipaT jaa.e
vahm ye hai ki band darvāza
dekh kar hī na vo palaT jaa.e
siikh dariyā se koh-paimā.ī
koī kyuuñ rāste se haT jaa.e
kaun māregā dūsrā patthar
koī sūrat ki dard baT jaa.e
maiñ havā huuñ ki chal rahā huuñ hanūz
arsa-e-dahr hī na kaT jaa.e
be-dilī ḳhil.at-e-nadāmat hai
ik balā hai agar chimaT jaa.e
apne chehre ko Dhāñp Dhāñp ke rakh
aa.ina gard se na aT jaa.e