dil bhar aa.e aur abr-e-dīda meñ paanī na ho

ye zamīñ sahrā dikhā.ī de jo bārānī na ho

shauq itnā sahal kyuuñ us paar le jaa.e mujhe

phir palaT aa.uuñ agar dariyā meñ tuġhyānī na ho

kaan bajte haiñ havā kī sīTiyoñ par rāt-bhar

chauñk uThtā huuñ ki aahaT jānī-pahchānī na ho

ho ga.e be-ḳhud to Tīsoñ kā maza chhin jā.egā

roktā huuñ dard kī itnī farāvānī na ho

tere hone se mire dil meñ hai yādoñ kī chamak

chāñd bujh jaa.e agar sūraj meñ tābānī na ho

Dhāñp le miTTī se tan apnā agar maqdūr ho

pairahan kaisā agar ehsās-e-uryānī na ho

jī rahā huuñ maiñ ki auroñ se bhī hai vābastagī

maut aa jaa.e agar koī pareshānī na ho

Daal de 'shāhid' shafaq par raat kī kaalī ridā

mere darvāze se zāhir ghar kī vīrānī na ho