qaa.il karūñ kis baat se maiñ tujh ko sitamgar
Dhalvān pe ruktā nahīñ paanī ho ki patthar
sūraj nikal aayā to vo mausam na rahegā
kuchh der kā mehmāñ hai yahāñ sub.h kā manzar
bāhar jo maiñ niklūñ to barahna nazar aa.uuñ
baiThā huuñ maiñ ghar meñ dar-dīvār pahan kar
bekār gayā gahre samundar meñ utarnā
lahreñ mujhe phir Daal ga.iiñ ret ke uupar
aa dekh ki huuñ ab bhī maiñ āġhosh-kushāda
āñkheñ haiñ mirī os meñ bhīgā huā bistar
kyā mujh se mirī umr kā qad naap rahe ho
har pal hai yahāñ kitnī hī sadiyoñ ke barābar
bādal ho to phir khul ke baras lo kabhī shāhid
hai baat agar dil meñ to kah do use muñh par