ḳhushk āñkhoñ se lahū phuuT ke ronā ik din

varna le Dūbegā mujh ko mirā honā ik din

kyā pata thā tirī jaltī huī sāñsoñ kī qatār

merī sāñsoñ hī pe Dālegī bichhaunā ik din

ek bhī rañg kī lau ūñchī na hone paa.ī

an-ginat rañgoñ meñ jis ko thā samonā ik din

maiñ kabhī zehn ke zīnoñ se utar ā.ūñgā

lā ke rakh de mire hāthoñ pe khilaunā ik din

roz bin-barse guzar jā.eñge bādal kab tak

apne ashkoñ se 'sabā' un ko bhigonā ik din