maiñ kho gayā huuñ kahāñ āshiyāñ banāte hue

zamīn bhuul gayā āsmāñ banāte hue

sitāra-vār chamaktā har ek zarra mirā

bikhar na jaa.e kahīñ kahkashāñ banāte hue

tumhāre naam pe maiñ jal-bujhā to ilm huā

ki suud bantā hai kaise ziyāñ banāte hue

mahāz par hī rahā huuñ lahū ke bujhne tak

qalam hue mire baazū kamāñ banāte hue

qadam kuchh aisā uThā āḳhirī qadam ki 'latīf'

maiñ do jahāñ se gayā ik jahāñ banāte hue