dil meñ zaḳhmoñ kī na.ī fasl ugāne nikle
dard ke phuul bayābāñ meñ khilāne nikle
har imārat pe na.e saal kā katba dekhā
pahuñche nazdīk to āsār purāne nikle
pahle har dar pe rakhe sho.ala-bayānī ke diye
jal uThā shahr to phir aag bujhāne nikle
chāñd jab ruuTh ke ruḳhsat huā bām-o-dar se
log tapte hue sūraj ko manāne nikle
har qadam talḳhī-e-ta.abīr ke patthar barse
ḳhvāb-zāroñ ko kabhī ham jo sajāne nikle
dil ne jab qaid-e-ta.alluq se rihā.ī māñgī
qurbatoñ ke liye kuchh aur bahāne nikle