ye maanā tum ho zamāne ke bā-kamāloñ meñ

to ham bhī ḳhud ko samajhte haiñ be-misāloñ meñ

vafā kā naam nahīñ shahr ke ġhazāloñ meñ

milegā zahr yahāñ mad-bhare piyāloñ meñ

mahak uThā hai mirī aarzū kā shīsh-mahal

ye kaun aa ke basā hai mire ḳhayāloñ meñ

hamāre paas thā har baat kā javāb magar

ulajh ke rah ga.e ham aap ke savāloñ meñ

ham un ke hañsne kā andāz kyā kaheñ 'sumbul'

ki jaise duur bajeñ ghanTiyāñ shivāloñ meñ