bichhaḌ ga.e the kisī roz khel khel meñ ham
ki ek saath nahīñ chaḌh sake the rail meñ ham
zarā sā shor-e-baġhāvat uThā aur us ke ba.ad
vazīr taḳht pe baiThe the aur jail meñ ham
pata chalā vo koī aam panting nahīñ hai
aur us ko bechne vaale the aaj sale meñ ham
jafā kī ek hī tiilī se kaam ho jaatā
ki puure bhīge hue the anā ke tel meñ ham
jo shar-pasand haiñ nafrat ke biij bote raheñ
juTe raheñge mohabbat kī dāġh-bel meñ ham
bas ek baar hamāre diloñ ke taar mile
phir us ke ba.ad nahīñ aa.e tāl-mel meñ ham
ye shā.irī to mirī jaañ bas ik bahāna hai
sharīk yuuñ bhī nahīñ hote khel-vel meñ ham
suḳhan kā tausan-e-chālāk be-lagām nahīñ
hameñ hai pās-e-rivāyat so haiñ nakel meñ ham
vahāñ hamāre qabīloñ meñ jañg chhiḌ ga.ī thī
so thar ke bhāge hue aa base the kel meñ ham
ye ek dukh to koī mas.ala nahīñ 'kāshir'
pale baḌe haiñ isī ġham kī rel-pel meñ ham