yuuñ log chauñk chauñk kar uñglī uThā.e haiñ
jaise ham aaj pahle-pahal muskurā.e haiñ
aksar khulī fazāoñ meñ bhī sansanā.e haiñ
ham par hamāre ghar ne vo patthar chalā.e haiñ
ai mauj-e-gul idhar kā abhī ruḳh na kījiyo
kuchh log taaza taaza bayābāñ meñ aa.e haiñ
mahrūmiyoñ ke zahr se ham kab ke mar chuke
ye to ab apne jism kā lāsha uThā.e haiñ
haañ ham ko e'tirāf hai is kā ki ziist ko
ādāb ham ne jurm-e-vafā ke sikhā.e haiñ
dauḌe haiñ log sañg-e-taġhāful liye hue
ham jab bhī apne shahr ke nazdīk aa.e haiñ
fursat kahāñ nasīb qayām-o-qarār kī
ham log vaqt-e-shām daraḳhtoñ ke saa.e haiñ
is darja bhiiḌ itnī ghuTan hai ki al-amāñ
yādoñ kā shahr chhoḌ ke ham bhaag aa.e haiñ
vīrāna-e-ḳhayāl kī vahshat na kam huī
hālāñki baat baat pe ham muskurā.e haiñ
chehre pe paḌ rahī hai tirī be-ruḳhī kī dhuup
siine meñ har taraf tirī yādoñ ke saa.e haiñ
raftār-e-zindagī hai ki māñge hai bijliyāñ
ham haiñ ki be-hisī ko gale se lagā.e haiñ
yāroñ ko haal vādi-e-ġhurbat kā kyā likheñ
mahsūs ho rahā hai ham apne ghar aa.e haiñ
zabt-e-ġham-e-hayāt bhī jin ko na pī sakā
'nāzish' vo ashk ham ne ġhazal meñ chhupā.e haiñ