tirī nazar ke ishāroñ se khel saktā huuñ

jigar-faroz sharāroñ se khel saktā huuñ

tumhāre dāman-e-rañgīñ kā aasrā le kar

chaman ke mast nazāroñ se khel saktā huuñ

kisī ke ahd-e-mohabbat kī yaad baaqī hai

baḌe hasīn sahāroñ se khel saktā huuñ

maqām-e-hosh-o-ḳhirad intiqām-e-vahshat hai

junūñ kī rāh-guzāroñ se khel saktā huuñ

mujhe ḳhizāñ ke bagūle salām karte haiñ

hayā-farosh chanāroñ se khel saktā huuñ

sharāb o sher ke dariyā meñ Duub kar 'sāġhar'

surūr-o-kaif ke dhāroñ se khel saktā huuñ