aahan kī surḳh taal pe ham raqs kar ga.e
taqdīr terī chaal pe ham raqs kar ga.e
panchhī bane to rif.at-e-aflāk par uḌe
ahl-e-zamīñ ke haal pe ham raqs kar ga.e
kāñToñ se ehtijāj kiyā hai kuchh is tarah
gulshan kī Daal Daal pe ham raqs kar ga.e
vaa.iz fareb-e-shauq ne ham ko lubhā liyā
firdaus ke ḳhayāl pe ham raqs kar ga.e
har e'tibār-e-husn-e-nazar se guzar ga.e
har halqa-hā-e-jāl pe ham raqs kar ga.e
māñgā bhī kyā to qatra-e-chashm-e-tasarrufāt
'sāġhar' tire savāl pe ham raqs kar ga.e