baḌī hī añdherī Dagar hai miyāñ
jahāñ ham faqīroñ kā ghar hai miyāñ
hai fursat to kuchh der mil baiThiye
judā.ī se kis ko mafar hai miyāñ
gharauñde yahāñ ret ke mat banāo
ki sail-e-havā zor par hai miyāñ
kabhī but-shikan the par ab ḳhud-shikan
ye ilzām bhī apne sar hai miyāñ
to phir kaj-kulāhī pe isrār kyuuñ
agar sañg-bārī kā Dar hai miyāñ
koī bach nikalne kī sūrat nahīñ
ye aaseb har moḌ par hai miyāñ
to phir ruḳh badalne se kyā fā.eda
muqaddar jab andhā safar hai miyāñ