duur se kyā muskurā kar dekhnā
dil kā aalam dil meñ aa kar dekhnā
ḳhud ko gar pahchānñā chāho kabhī
mujh ko ā.īna banā kar dekhnā
qad kā andāza tumheñ ho jā.egā
apne saa.e ko ghaTā kar dekhnā
maiñ añdhere oḌh kar so jā.ūñgā
tum ujāloñ meñ samā kar dekhnā
shaam kā manzar hasīñ ho jā.egā
haath pe mehñdī lagā kar dekhnā
ho chalā zaḳhm-e-tamannā mundamil
ik zarā phir muskurā kar dekhnā
kis qadar 'āġhāz' ubaltā hai sakūñ
tum zarā aañsū bahā kar dekhnā