ab agar ishq ke āsār nahīñ badleñge
ham bhī pairāya-e-iz.hār nahīñ badleñge
rāste ḳhud hī badal jaa.eñ to badleñ varna
chalne vaale kabhī raftār nahīñ badleñge
duur tak hai vahī aaseb kā pahra ab bhī
kyā mire shahr ke atvār nahīñ badleñge
maiñ samajhtā huuñ sitāre jo sahar se pahle
bujhne vaale haiñ shab-e-tār nahīñ badleñge
gul badal jā.eñge jab mausam-e-gul bichhḌegā
jab ḳhizāñ jā.egī to ḳhaar nahīñ badleñge
log badleñge mafāhīm musalsal 'āġhāz'
aur ye sach hai mire ash.ār nahīñ badleñge