kar ke sāgar ne kināre mustarad

kar diye apne sahāre mustarad

sharam-gīñ nazroñ ne us kī kar diye

merī āñkhoñ ke ishāre mustarad

aap ke āñchal meñ saj kar jī uThe

the falak par jo sitāre mustarad

us se mil kar phuul shabnam chāñdnī

ho ga.e sab isti.āre mustarad

raah dikhlā hī na aa.eñ jo durust

kar diye jaa.eñ aise taare mustarad

aap se mujh ko milī hai daad ab

ya.anī pichhle sher saare mustarad