ab tak to yahī patā nahīñ hai
is shahr meñ kyā hai kyā nahīñ hai
patte ko na is tarah se dekho
Tahnī se abhī girā nahīñ hai
chup-chāp khaḌā huā huuñ kab se
ehsās to hai sadā nahīñ hai
ik lamhe meñ maiñ bhī tū bhī dukh bhī
zālim koī vaqt sā nahīñ hai
jo aks hai aa.ine meñ merā
us se koī vāsta nahīñ hai
us raah pe chal rahā huuñ kab se
jis raah meñ naqsh-e-pā nahīñ hai
har tan pe jo 'ashk' Thiik baiThe
vo coat abhī silā nahīñ hai