chehra-e-zindagī nikhar aayā
jab kabhī ham ne jaam chhalkāyā
shām-e-hijrāñ bhī ik qayāmat thī
aap aa.e to mujh ko yaad aayā
rañg phīkā paḌā vafāoñ kā
aaj kuchh is tarah vo sharmāyā
yuuñ to be-chainiyāñ muqaddar thiiñ
terī qurbat ne aur taḌpāyā
kyā qayāmat vo kam-nigāhī thī
har haqīqat ko jis ne jhuThlāyā
kyā huī vo diloñ kī māsūmī
husn rūThā na ishq pachhtāyā
haa.e kis kis maqām par dil ko
us uchaTtī nazar ne bhaTkāyā
ḳhud-shanāsī thī justujū terī
tujh ko DhūñDā to aap ko paayā
'naqsh' āñkhoñ meñ aa ga.e aañsū
aaj aise meñ kaun yaad aayā