fareb-e-rāh se ġhāfil nahīñ hai
junūñ gum-karda-e-manzil nahīñ hai
mirī nākāmiyoñ par hañsne vaale
tire pahlū meñ shāyad dil nahīñ hai
ḳhudā ko nā-ḳhudā kahne lagā huuñ
safīna tālib-e-sāhil nahīñ hai
tirī bazm-e-tarab meñ aa gayā huuñ
magar dil ko sukūñ hāsil nahīñ hai
are us kī nigāh-e-be-ḳhabar bhī
mire anjām se ġhāfil nahīñ hai
mire zauq-e-safar kā pūchhnā kyā
nigāhoñ meñ mirī manzil nahīñ hai
ba-faiz-e-ishq karb-e-marg se 'naqsh'
guzar jaanā koī mushkil nahīñ hai