tū ne lagā.ī ab kī ye kyā aag ai basant
jis se ki dil kī aag uThe jaag ai basant
kaifiyyat-e-bahār ke tū us ko de ḳhabar
mauj-e-nasīm kī tarah uḌ laag ai basant
har shāḳh zard o surḳh o siyah hijr-e-yār meñ
Daste haiñ dil ko aan ke juuñ naag ai basant
muñh dekho āshiqoñ ke muqābil huuñ rañg meñ
bāñdhī hai mujh se kis liye tū laag ai basant
tujh meñ kahāñ ye būqalamūnī kahāñ ye sañg
dasht-o-jabal ko ḳhair se ab bhaag ai basant
juuñ tār-e-chañg chheḌ na 'inshā' ko baat meñ
terā sunā huā hai ye ghaTrāg ai basant