ashk mizhgān-e-tar kī pūñjī hai
ye samar us shajar kī pūñjī hai
aah ko mat haqīr jaan yahī
dūdmān-e-asar kī pūñjī hai
jo ghaḌī yaad meñ tirī kaT jaa.e
vo hī āThoñ pahar kī pūñjī hai
jalva-e-yār hai aziiz bahut
yahī ahl-e-nazar kī pūñjī hai
jald achchhā ho ye ta.ālallāh
yahī 'inshā' ke ghar kī pūñjī hai
terī baḳhshī hui ḳhudāvandā
merī ye umr bhar ke pūñjī hai
maiñ tire sadqe bas yahī mere
dil-o-jān-o-jigar kī pūñjī hai