vo parī hī nahīñ kuchh ho ke kaḌī mujh se laḌī
aañkh nargis se bhī do-chār ghaḌī mujh se laḌī
vāste tere mirā rañg-mahal hai dushman
terī ḳhātir to har ik chhoTī baḌī mujh se laḌī
jhaḌ lagā dī mirī ā.ankhoñ ne to lo aur suno
TukTukī bāñdh ke kyuuñ muñh kī jhaḌī mujh se laḌī
raat laḌ-bhiḌ vo jo chup ho rahī to un ke evaz
bolte the vo jo sone kī ghaḌī mujh se laḌī
baiThe baiThe kahīñ bulbul ko jo chheḌā maiñ ne
to nasīm us kī badal ho ke khaḌī mujh se laḌī
kaun sī huur yahāñ khelne chauthī aa.ī
bū-e-gul le ke jo phūloñ kī chhaḌī mujh se laḌī
ruuTh kar un kī galī meñ jo lagā tū 'inshā'
har ik us do laḌī motī kī laḌī mujh se laḌī