ahl-e-junūñ the fasl-e-bahārāñ ke sar ga.e

ham log ḳhvāhishoñ kī harārat se mar ga.e

hijr o visāl ek hī lamhe kī baat thī

vo pal guzar gayā to zamāne guzar ga.e

ai tīrgī-e-shahr-e-tamannā batā bhī de

vo chāñd kyā hue vo sitāre kidhar ga.e

vahshat ke is nagar meñ vo qaus-e-quzah se log

jaane kahāñ se aa.e the jaane kidhar ga.e

ḳhushbū asiir kar ke uḌaa.e phirī hameñ

phir yuuñ huā ki ham bhī fazā meñ bikhar ga.e