nazzāra ajab us ke garebāñ kī taraf thā

har aañkh kā ruḳh sīna-e-uryāñ kī taraf thā

maiñ dekh rahā thā kahīñ jaltī huī sham.eñ

aur dhyān mirā dūd-e-pareshāñ kī taraf thā

maiñ leTā rahā ghaas pe saa.e meñ baḌī der

aage kā safar saarā bayābāñ kī taraf thā

do rāste the ek jagah rāz-e-jahāñ meñ

ik ghar kī taraf dūsrā zindāñ kī taraf thā

kuchh paḌ sā gayā dīda-e-mushtāq meñ us vaqt

jab garm-e-tamāshā kisī maidāñ kī taraf thā

taare ki utar aa.e the ik dasht-e-balā meñ

mahtāb kisī qarya-e-vīrāñ kī taraf thā

baiThā thā kahīñ husn-e-numā.ish-gah-e-ġham meñ

ruj.hān zarā shohrat-e-arzāñ kī taraf thā

ye kaise huā kyuuñ maiñ nikal aayā sar-e-rāh

jaanā to mujhe kūcha-e-jānāñ kī taraf thā

mahfil meñ vo kartā rahā ik chor se hushiyār

aur us kā ishāra mire mehmāñ kī taraf thā

āsār the āñdhī meñ baḌī chup sī fazā meñ

ruḳh vaqt ke dhāre kā bhī tūfāñ kī taraf thā

vo qāfila-e-gul ke guzar jaane kī ḳhabar thī

uḌtā huā jo rañg gulistāñ kī taraf thā

ik haath thā duniyā kā mirī jeb pe 'shāhīñ'

jo dūsrā thā mere garebāñ kī taraf thā