phuul kā yā sañg kā iz.hār kar
āsmāñ aurañg kā iz.hār kar
jism ke rauzan se pahle ḳhud nikal
phir qabā-e-tañg kā iz.hār kar
phuul kī pattī pe koī zaḳhm Daal
aa.ine meñ rañg kā iz.hār kar
ābgīnoñ meñ siyāhī bhar ke chal
dostī meñ jañg kā iz.hār kar
dhuul se anfās ke paikar tarāsh
ḳhushbuoñ meñ rañg kā iz.hār kar
paḌh rahā thā maiñ qasīda naam kā
koī bolā nañg kā iz.hār kar
kaun kitnā aadmī hai ye batā
aah meñ āhañg kā iz.hār kar