do-chār kyā haiñ saare zamāne ke bāvajūd
ham miT nahīñ sakeñge miTāne ke bāvajūd
ye raaz kaash bād-e-muḳhālif tū jaan le
kyuuñ jal rahe haiñ tere bujhāne ke bāvajūd
ab bhī bahut ġhurūr hai ik haath par use
ik haath hādse meñ gañvāne ke bāvajūd
buzdil thā mustahiq thā maiñ mujh ko sazā milī
baḳhshā na us ne haath uThāne ke bāvajūd
ḳhvāboñ ke shauq meñ kahīñ āñkheñ gañvā na deñ
ham so rahe haiñ niiñd na aane ke bāvajūd