vo rulā kar hañs na paayā der tak
jab maiñ ro kar muskurāyā der tak
bhūlnā chāhā kabhī us ko agar
aur bhī vo yaad aayā der tak
ḳhud-ba-ḳhud be-sāḳhta maiñ hañs paḌā
us ne is darja rulāyā der tak
bhūke bachchoñ kī tasallī ke liye
maañ ne phir paanī pakāyā der tak
gungunātā jā rahā thā ik faqīr
dhuup rahtī hai na saayā der tak
kal añdherī raat meñ merī tarah
ek jugnū jagmagāyā der tak