safar meñ mushkileñ aa.eñ to jur.at aur baḌhtī hai
koī jab rāsta roke to himmat aur baḌhtī hai
bujhāne ko havā ke saath gar bārish bhī aa jaa.e
charāġh-e-be-haqīqat kī haqīqat aur baḌhtī hai
mirī kamzoriyoñ par jab koī tanqīd kartā hai
vo dushman kyuuñ na ho us se mohabbat aur baḌhtī hai
zarūrat meñ azīzoñ kī agar kuchh kaam aa jaao
raqam bhī Duub jaatī hai adāvat aur baḌhtī hai
agar bikne pe aa jaao to ghaT jaate haiñ daam aksar
na bikne kā irāda ho to qīmat aur baḌhtī hai