batā.ūñ kyā ki mire dil meñ kyā hai

sivā tere tirī mahfil meñ kyā hai

batā.ūñ kyā ki mere dil meñ kyā hai

tū hī tū hai bharī mahfil meñ kyā hai

kisī ke bujhte dil kī hai nishānī

charāġh-e-sarhad-e-manzil meñ kyā hai

ba-juz naqsh-e-pashemānī-e-qātil

nigāh-e-hasrat-e-bismil meñ kyā hai

jafāoñ kī bhī had hotī hai koī

ḳhudā ma.alūm us ke dil meñ kyā hai

ma.āl-e-hastī-e-mauhūm ma.alūm

'azīz' is shaġhl-e-lā-hāsil meñ kyā hai