ye to sochā hī nahīñ us ko judā karte hue

chun liyā hai ġham bhī ḳhushiyoñ ko rihā karte hue

jin charāġhoñ par bharosa thā unhoñ ne āḳhirash

sāzisheñ kar liiñ havāoñ se daġhā karte hue

aañkh ke sandūqche meñ band hai ik sail-e-dard

Dar rahī huuñ qufl un palkoñ ke vā karte hue

jāntī thī kab bhaTaktī hī rahegī dar-ba-dar

ham-safar apnā sahāboñ ko ghaTā karte hue

dost ko pahchāntī thiiñ āñkheñ na dushman koī

phoḌ Daalā hai unheñ apnī sazā karte hue