manzil-e-marg meñ jiine kī adā rakhtā huuñ

ya.anī har haal meñ andāz judā rakhtā huuñ

juz havā koī nahīñ mūnis-o-ġham-ḳhvār magar

rāt-bhar kamre kā darvāza khulā rakhtā huuñ

apnī fitrat ko sikhātā huuñ ġhulāmī terī

mauj-e-āzād ko zanjīr-ba-pā rakhtā huuñ

gum huuñ qatre kī tarah vaqt ke dariyā meñ magar

apnī hastī kā tilismāt judā rakhtā huuñ

zer-e-pā haiñ mire sahrāoñ ke jalte maidāñ

sar pe ālām ke sho.aloñ kī ridā rakhtā huuñ

bahr-e-āzār bhī hai hadd-e-nazar tak raqsāñ

jazba-e-shauq agar had se sivā rakhtā huuñ

merī fariyād pe kab bāb-e-ināyāt khulā

haa.e kis muñh se kahūñ maiñ bhī ḳhudā rakhtā huuñ

ġham na kar tū hai agar ḳhū-e-ḳharābī kā asiir

maiñ bhī ālām se paimān-e-vafā rakhtā huuñ

kyuuñ nahīñ aks-e-abad meñ bhī samundar jaisā

naqsh-bar-āb huuñ ḳhāliq se gilā rakhtā huuñ

'arsh' maiñ ḳhud huuñ sadā apne sukūñ kā dushman

dasht-e-ummīd bhī bar-dosh-e-havā rakhtā huuñ