mujh ko mat chhūnā ki ris kar phūTne vaalā huuñ maiñ

tujh ko kyā ma.alūm tere tanz kā chhālā huuñ maiñ

aaj zehnoñ meñ huuñ lekin kal kā andesha huuñ maiñ

darmiyāñ donoñ ke gir kar TūTtā rishta huuñ maiñ

āḌī-tirchhī sī lakīreñ khīñchtā huuñ aur phir

us ko har manzar meñ rakh kar rañg bhar detā huuñ maiñ

vo to yuuñ ḳhush hai samajhtā hai ki maiñ tairāk huuñ

us ko kyā ma.alūm ḳhud hī Dūbne vaalā huuñ maiñ

apnī gul-poshī pe maiñ nādim bhī huuñ sarshār bhī

haar kar jiitā huuñ jaane jiit kar haarā huuñ maiñ