kabhī bahār kabhī gul kabhī subū Thahrī
vo aañkh jo kisī jannat kī āb-jū Thahrī
rusūm-e-dard nibhā.eñ ki aap ko chāheñ
yahī to shart-e-mulāqāt dū-badū Thahrī
har ek pal meñ hazāroñ Thahar ga.iiñ sadiyāñ
nasīm-e-sub.h-e-tamannā magar na tū Thahrī
laboñ kī narm lapeToñ meñ ghultī ghultī shafaq
kahīñ lahū kahīñ rañgīnī-e-subū Thahrī
dar-e-firāq pe dam-bhar ko nik.hat-e-saharī
tire ḳhirām kī mānind hū-ba-hū Thahrī
tumhārā lams mo.attar tumhārā jism bahār
yahī to bahs gulāboñ ke rū-ba-rū Thahrī