mausam badal sake na tire intizār ke
ab ke bhī din guzar ga.e yūñhī bahār ke
ġham-ḳhez-o-ġham-shanās mirī pur-shikoh raat
kab aaogī pahāḌ sā ye din guzār ke
aayā huzūr-e-yār se shā.ir ko ye payām
aa.e sharāb-o-sher kā choġhā utaar ke
dil meñ tire utar na sakī merī koī baat
likkhe haiñ laakh sher ġhazal ke sañvār ke
ek musht-e-ḳhāk ban ke uḌā dil kā kārvāñ
dasht-e-talab meñ ab bhī nishāñ haiñ ġhubār ke