nishāñ kisī ko milegā bhalā kahāñ merā
ki ek ruuh thā maiñ jism thā nishāñ merā
har ek saañs nayā saal ban ke aatā hai
qadam qadam abhī baaqī hai imtihāñ merā
mirī zamīñ mujhe āġhosh meñ sameT bhī le
na āsmāñ kā rahūñ maiñ na āsmāñ merā
chalā gayā tire hamrāh ḳhauf-e-rusvā.ī
ki tū hī raaz thā aur tū hī rāz-dāñ merā
tujhe bhī merī tarah dhuup chaaT jā.egī
agar rahā na tire sar pe sā.ebāñ merā
malāl-e-rañg-e-jalāl-o-jamāl Thahrā hai
dayār-e-sañg huā hai dayār-e-jāñ merā
ka.ī 'najīb' isī aag se janam leñge
ki merī raakh se banñā hai āshiyāñ merā