pairahan uḌ jā.egā rañg-e-qabā rah jā.egā
phuul ke tan par faqat aks-e-havā rah jā.egā
ham to samjhe the ki chāroñ dar muqaffal ho chuke
kyā ḳhabar thī ek darvāza khulā rah jā.egā
kirchiyāñ ho jā.eñgī āñkheñ bhī ḳhvāboñ kī tarah
ā.īnoñ meñ naqsh sā tasvīr kā rah jā.egā
baat lab par aa ga.ī to kaun rokegā use
aur terā haath hoñToñ se lagā rah jā.egā
soch lenā an-sunī bāteñ suneñge ek din
dekh lenā har fasāna an-kahā rah jā.egā
ai gunahgāroñ ke dushman ai niko-kāroñ ke yaar
kaun jaane kyā miTegā aur kyā rah jā.egā
ham bichhaḌ jā.eñge shāḳh-e-umr se gir kar 'najīb'
ik tane par naam donoñ kā likhā rah jā.egā