badan se jaañ nikalnā chāhtī hai
balā us ghar se Talnā chāhtī hai
yūñhī ātish-fishāñ kab jāgte haiñ
zamīñ karvaT badalnā chāhtī hai
hudūd-e-sahn-e-gulshan se nikal kar
sabā galiyoñ meñ chalnā chāhtī hai
dhuāñ sā uTh rahā hai chaar jānib
koī sūrat nikalnā chāhtī hai
havāoñ meñ nahīñ quvvat numū kī
magar Tahnī to phalnā chāhtī hai
jo chehra hai vahāñ phūlī hai sarsoñ
zamīñ sonā ugalnā chāhtī hai