Rind Lakhnavi

sailana un ke dar par jab mera jaana hua

Rind Lakhnavi

Faizabad, Uttar pradesh, India

1797-1857

sā.ilāna un ke dar par jab mirā jaanā huā

hañs ke bole shāh-sāhib kis taraf aanā huā

TuuTe but masjid banī mismār but-ḳhāna huā

jab to ik sūrat bhī thī ab saaf vīrāna huā

har jagah maujūd samjhā us ko sajda kar liyā

ḳhvāh masjid ḳhvāh girjā ḳhvāh but-ḳhāna huā

baaz rakhtī hai hameñ ḳhidmat se az-ḳhud-raftagī

aan nikleñge kabhī gar aap maiñ aanā huā

beshtar bulbul se thā sar meñ mire shor-e-junūñ

fasl-e-gul aane na paa.ī thī ki dīvāna huā

garmī-e-furqat meñ jab ashkoñ se mizhgāñ tar huiiñ

mardumān-e-chashm ke rahne ko ḳhas-ḳhāna huā

kār-ḳhāne jitne haiñ duniyā ke sab haiñ be-sabāt

aañkh se jo aaj dekhā kal vo afsāna huā

hañste hañste dil-lagī ke vāste naapā jo aaj

sarv qad us sahī-qāmat ke tā-shāna huā

yūsuf-e-misr-e-mohabbat kaisā arzāñ bik gayā

naqd-e-dil qīmat huī ik bosa bai.āna huā

jal ke us ne jaan ye naale kar ke rah ga.ī

ishq-e-bulbul par bhī faa.iq ishq-e-parvāna huā

ishq-e-dandāñ ḳhatā par qatl jo mujh ko kiyā

is liye shamshīr-e-qātil meñ bhī dandāna huā

maiñ ne jaanā kāsa-e-sar hai kisī mai-ḳhvār

vāzhgūna dast-e-sāqī meñ jo paimāna huā

muzhda-bād ai bāda-ḳhvāro daur-e-vā.iz ho chukā

madrase khole ga.e ta.amīr mai-ḳhāna huā

'rind' huuñ roz-e-azal se huuñ maiñ vārafta-mizāj

is liye taur-e-suḳhan bhī apnā rindāna huā

Top Urdushayar.com