huī hai mehrbāñ un kī nazar āhista āhista
huā tai ye mohabbat kā safar āhista āhista
huā rañgīn mausam kā asar āhista āhista
machalte haiñ mire qalb-o-nazar āhista āhista
idhar mere dil-e-betāb kī baḌhtī hai betābī
udhar kaalī ghaTāoñ kā asar āhista āhista
bahut mohtāt ho kar bhī guzar jā.eñge ham lekin
utar jā.egī dil meñ vo nazar āhista āhista
'karan' ik roz mere dil ko dīvāna banā degā
kisī kī mast āñkhoñ kā asar āhista āhista