tirī nazar bhī nahīñ harf-e-mudda.ā bhī nahīñ
ḳhudā-gavāh mire paas kuchh rahā bhī nahīñ
hazār manzil-e-ġham se guzar chuke lekin
abhī junūn-e-mohabbat kī ibtidā bhī nahīñ
ġham-e-firāq ye shab kis tarah se guzregī
ki ab to aas kī mauhūm sī ziyā bhī nahīñ
na jaane kis liye ab bhī hai dil se baḌh ke aziiz
siyāh-dil bhī nahīñ aur pārsā bhī nahīñ
jo sach kahūñ to mohabbat-shi.ār 'ajmal' meñ
hazār aib sahī aadmī burā bhī nahīñ