vo bād-e-garm thā bād-e-sabā ke hote hue
maiñ zaḳhm zaḳhm thā barg-e-hinā ke hote hue
bas ek manzar-e-ḳhālī thā merī āñkhoñ meñ
nigār-e-ḳhāna-e-rañg-e-hinā ke hote hue
vo tāq-e-dil ho ki mehrāb-e-mimbar-e-maqtal
charāġh sab ne jalā.e havā ke hote hue
ajiib log the ḳhāmosh rah ke jiite the
diloñ meñ hurmat-e-sañg-e-sadā ke hote hue
vo ek vasl kī shab bhī malāl meñ guzrī
girah-e-kushā.ī-e-band-e-qabā ke hote hue
vo lauT aa.e the ranj-e-safar ke imkāñ se
rafīq-e-rāh kī āvāz-e-pā ke hote hue
na kam huā thā gunāhoñ se raġhbatoñ kā junūñ
hazār sohbat-e-sidq-o-safā ke hote hue