thā harf-e-shauq said huā kaun le gayā
maiñ jis ko sun sakūñ vo sadā kaun le gayā
ik maiñ hī jāma-posh thā uryāniyoñ ke biich
mujh se mirī abā o qabā kaun le gayā
ehsās bikhrā bikhrā sā haarā huā badan
chaḌhtī harārtoñ kā nasha kaun le gayā
bātoñ kā husn hai na kahīñ shoḳhi-e-bayāñ
shahr-e-navā se harf o sadā kaun le gayā
maiñ kab se huuñ asiir sarāboñ ke jaal meñ
niile samundaroñ pe ghaTā kaun le gayā
mai-ḳhāna chhoḌ ghar kī fazāoñ meñ aa ga.e
ham se matā-e-laġhzish-e-pā kaun le gayā
maiñ jab na thā to mujh pe bahut qahqahe lage
ahbāb se sirisht-e-vafā kaun le gayā