vo aa gayā to saarā parī-ḳhāna jī uThā
ārā.ish-e-jamāl se ā.īna jī uThā
mujh tak pahuñch gayā to baḌī baat jāniye
āvāz-e-pā se jis kī mirā ziina jī uThā
yārān-e-mai-kada jo kabhī yaad aa ga.e
mujh meñ ḳhumār-e-mahfil-e-pārīna jī uThā
the dīdanī libāsoñ meñ tarshe hue badan
oḌhī jo us ne shaal to pashmīna jī uThā
chaa.e kī mez par ga.ī shāmoñ kā zikr thā
mujh meñ bhī ik ta.alluq-e-derīna jī uThā