ġhurūb-e-shām hī se ḳhud ko yuuñ mahsūs kartā huuñ
ki jaise ik diyā huuñ aur havā kī zad pe rakkhā huuñ
chamaktī dhuup tum apne hī dāman meñ na bhar lenā
maiñ saarī raat peḌoñ kī tarah bārish meñ bhīgā huuñ
ye kis āvāz kā bosa mire hoñToñ pe kāñpā hai
maiñ pichhlī sab sadāoñ kī halāvat bhuul baiThā huuñ
bichhaḌ ke tum se maiñ ne bhī koī sāthī nahīñ DhūñDā
hujūm-e-rahguzar meñ duur tak dekho akelā huuñ
koī TuuTā huā rishta na dāman se ulajh jaa.e
tumhāre saath pahlī baar bāzāroñ meñ niklā huuñ
maiñ gir ke TuuT jā.ūñ yā koī mehrāb mil jaa.e
na jaane kab se hāthoñ meñ khilaunā ban ke jiitā huuñ