tujh ko kho dene kā ehsās huā tere ba.ad
DhūñDhtā phirtā huuñ ab terā pata tere ba.ad
phir kisī aur se kī arz-e-tamannā na kabhī
mujh meñ armān na phir koī jagā tere ba.ad
biich raste meñ hameñ chhoḌ ke jaane vaale
e'timād ham ne kisī par na kiyā tere ba.ad
chalte phirte hue patthar haiñ yahāñ ke insāñ
kaun samjhegā bhalā dard mirā tere ba.ad
gardish-e-vaqt jise toḌ nahīñ paa.ī thī
dekh vo shaḳhs bhī ab TuuT gayā tere ba.ad
chāhne vaale mire aur bahut the lekin
maiñ kisī aur kā ho hī na sakā tere ba.ad
phailtā jaatā hai har samt añdherā 'sāgar'
zindagī jaise ho ik bujhtā diyā tere ba.ad